Igandea
Oso egun motela izan zen. Le Pain Quotidienen gosaldu ondoren, trena hamarretan hartu eta Lovainara joan ginen.
Euria etenik gabe egin zigun. Ez dakit eguraldiagatik edo igandea izateagatik zen, baina kaleak huts-hutsik zeuden. Lovaina hiri unibertsitarioa izanik, ziur asko gabon ostean ez da jende askorik ibiliko, hori egia da.
Udaletxea, katedrala eta beginen ingurua (oker ez banago ikasleen egoitzak dira egun) bisitatu genituen. Eta gehiegi pentsatu gabe, Bruselara itzuli ginen, blai eginda.
Hotel pareko Exkin bazkaldu genuen, eta arratsaldean erdiguneko kaleetan ibili ginen. Maison Dandoy gozotegiko gurinezko galleta ezagunak erosi (baita jan ere) eta, euriak jarraitzen zuenez, Laurent Gerbaud txokolategilearen lokalera joan ginen txokolate beroa dastatzeko asmoz.
Ravenstein galerietan duen lokalera joan ginen, Bozar inguruan. Zoritxarrez, jende guztiak ideia bera izan zuela dirudi, eta tokirik ez egoteaz gain, esnea ere amaitu zitzaien.
Zerbait hartu genuen nola edo hala eserita, eta, ixteko ordua iritsi zenean, paseo txiki bat eman eta faltzera abiatu ginen, egiteko besterik ez genuela.
Bidaia ondo amaitzeko Manhattan jatetxera joan ginen berriro ere.
Iragarritako haizete bortitzek hegazkina aireratzea ahalbidetuko ote zuten zalantzaz oheratu ginen.