Kategoria: bidaiak

Atzoko Josebaren begiko ebakuntzaren ondoren, gaur medikuak deitu du eta kontsultara joan zedin eskatu dio, ea nola zegoen ikusteko.

Josebak itzalak baino ez ditu ikusten begi horrekin. Gasaren eraginez da hori. Begia gorri dauka eta malkoren bat erortzen zaio noizean behin.

Juantxu eta biak kontsultara zihoazen bitartean, gainontzekoak Zaanse Schans herri turistikora joan gara. Kakaoa ehotzen duten errotak daude hemen. Usaia oso esanguratsua da.

Amsterdamera iritsitakoan ogitartekoak erosi eta hotelean jan ditugu. Arratsaldean tren geltokira joan gara. Batzuek kanaletan zehar dabiltzan ontzi horietako bat hartu dute, beste batzuk hotelean geratu dira, eta ni kanaletan gora eta behera ibili naiz.

Zoritxarrez arratsaldeko eguraldia ez da egokiena izan. Ez du hotzik egin baina bai euria, eta desatsegina da euripean eta blai ibiltzea.

Afaria jatetxe mexikar batean egin dugu eta zapore aldetik gaizki egon ez bada ere, izugarri tardatu dute janaria ekartzen. Inoiz baino beranduago amaitu dugu. Asteko pisua izugarri nabaritzen da, goizero-goizero 7ak aldean jaiki garelako eta 15 bat kilometro ibiltzen garelako. Ni behintzat lur jota nago.

Bihar azkenengo eguna da. Joseba eta Gara trenez joango dira Parisera, eta handik beste tren bat hartu Hendaiara. Taxi bat izango dute bertan zain. Bsteok eguna Amsterdamen emango dugu arratsaldeko bost t’erdiak arte. Orduan aireportura joan beharko gara, hegaldia irten baino hiru ordu lehenago, jende pila bat espero baitute eta segurtasun kontrolerako behar den denbora luzeagoa izango delako.

Joseba, Gara, Juantxu, eta Yolanda hotelean utzita, gainontzekoak autobus geltokira joan gara. Gidari bati galdetu eta berak esan bezala beheko pisura jaitsi gara autobus-txartelak erostera. Baina txartel horiek ez ziren baliagarriak guk egin nahi genuenerako, eta txartel egokiak erosi ondoren, erreklamatu eta hasieran erositako txartelen dirua berreskuratu dugu.

Hogeita hamar euro berreskuratu ditugun arren, ordu erdi inguru galdu dugu hori guztia egiten eta beranduago irten gara Amsterdametik. Gaur Volendam eta Marken kostaldeko herri famatuak ikusteko asmoa geneukan. Azken momentuan Edam izeneko herri txikia bisitatzera animatu gara, eta ez gara damutu.

Agian orduagatik izango zen, baina apenas zegoen jenderik Edam-en. Oso herri txiki eta atsegina da. Lehengo xarma dauka eta ez dago hainbeste turistarik. Horrek ez du esan nahi turistarik ez doanik. Joatekotan, ez erosi gaztarik, Amsterdamen gazta berbera aurkitzeko aukera dagoelako eta prezio erdian gainera.

Geroago Volendam-era joan gara autobusez. Edam eta Volendam oso gertu daude bata bestetik, ordu erdi oinez gutxi gorabehera baina, Edam ez bezala, Volendam turistaz josita dago, itsasora begira daukan paseoa behintzat. Oker ez banago hemen erosi nituen 2006an tulipan bulboak. Herria ez da itxusia baina tira. Bertan bazkaldu dugu eta ondoren itsasontzia hartu eta Marken-era iritsi gara.

Marken oso antzekoa da. Kostaldean dago eta dikeengatik izango ez balitz irla bat izango litzateke. Hau ere oso turistikoa da baina pare bat kaletan gora eta behera ibiltzeaz gain, ez dago larregi egiterik. Orduan jakin izan dugu Josebaren ebakuntza ondo atera dela.

Begian zeukan kaltea espero baino handiagoa zen eta horregatik ebakuntza luzeagoa izan da. Aseguru etxeak bart eta gaur goizean bertan arazorik ez zegoela esan arren, ordainketa egin gabe zegoen. Begia benda batekin estali diote baina bihar goizean kendu ahal izango du. Hori bai, ebakuntza gas bidez egin diotenez, ezin izango du igandean gurekin bidaiatu eta trenen bat hartu beharko du etxera itzultzeko.

Joseba eta besteak hotelerako bidean zeudenean, geu ere itzulerako autobusa hartu eta Amsterdamera abiatu gara. Dutxa bat hartu eta gero afaltzera irten gara. Kanpoko terrazan hotz egiten zuen eta janaria ez da izan espero bezain ona.

Eguzkia izan dugu egun osoan zehar, gehiegi nire ustez. Hankak, besoak eta –nola ez– sudurra erre zaizkit.

Bihar litekeena da errota tipikoak ikustera joatea, Josebaren osasunaren eta eguraldiaren arabera.

Atzo aurreratu bezala, medikuak Josebarentzat erietxean txanda hartutakoan deitu digu. Arratsaldeko hiruretan ospitalean egoteko esan digunez, goizean Amsterdameko kale jendetsuenetako batzuetan barrena ibili gara.

Euria izan dugu lagun ia egun osoan, eta ez da giro egokiena izan, baina horrek ere lagundu du jende kopurua txikitzen. Atzo baino lasaiago ibiltzeko aukera izan daugu.

Hiru taldetan banatu gara: hoteleko gelan geratu direnak, hots, Joseba; FOAM argazkilaritza museora joan direnak; eta dendaz denda Auzo Gorrira joan garenok, gehiengoa.

Auzo Gorrian badago aurreko bisitetan ikusi ezin izan dudan ezkutatutako eliza bat. Amsterdam protestantea zenean, gainontzeko erlijioak debekatuta egon ez arren, tenpluak ezin ziren bistan egon. Horregatik han eta hemen eliza txikiak zeuden, begi bistan ez zeudenak baina jendeak ezagutzen zituenak.

Eliza konkretu hau Alemaniatik zetorren garagardo ekoizle batek eginarazi zuen. Eliza ikusteaz gain, garaiko etxe bat barrutik ikusteko aukera ere ematen du bisitak. Hamar euro balio du sarrerak eta audiogida doakoa da. Beharbada gehien gustatu zaidan museoa izan da. Bitxia benetan.

Eguerdian hotelera itzuli eta supermerkatuko bokatak jan ditugu. Berehala etorri da taxia eta ospitalera eraman gaitu. Paper kontuekin hasieran arazo batzuk izan ditugun arren, konpondu eta espezialistak Joseba hartu du.

Begiko arazoa dela-eta, ebakuntza behar duela azaldu diote, lehen baitlehen. Momentu honetan ezkerreko begiaren ikusmena ehuneko 50ekoa da; bihar bertan operatuz gero, ehuneko 80 edota –kasurik onenean– 90a berreskuratuko luke. Bilbora iritsi arte itxaronez gero, litekeena da ehuneko 10a baino ezin ikustea hemendik aurrera.

Ebakuntza gas bidez izango litzateke eta horrek beste arazo bat sortu du: bi astetan Josebak ezingo luke hegazkinik hartu. Amsterdamen pare bat aste geratzea da aukera bat; bestea, trenez zein autoz itzultzea, 22an bertan berak hala nahi izanez gero.

Aseguru etxearekin hitz egin ondoren eta denborarik ez galtzea zein garrantzitsua den ikusita, Josebak ebakuntza ostiral goizean egitea onartu du. Bihar aztertu beharko dugu ze aukera duen etxera itzultzeko.

Bitartean, taldeko kide gehienak itsas-museora joan dira. Niri ere gustatuko litzaidaken ikustea, baina etorkizunean izan beharko da. Kontsultak arratsalde osoa kendu digu eta hotelera itzuli orduko afaltzeko ordua zen.

Bihar Juantxuk hartuko du itzultzaile papera. Bai bera eta baita Yolanda ere, Gararekin egongo dira Joseba operatzen duten bitartean. Zorionez ebakuntza anestesia lokalarekin egingo diote eta gauerako hotelean egongo da, gau bat ere ez du klinikan emango.

Egunak gogor samarrak izaten ari dira. Hasieran egunean 15 bat kilometro ibiltzen ginelako handik hona, eta gero Josebaren ikusmenaren kezkarekin. Patuaren seinaleren bat izango ote zen overbooking-a?

Van Gogh-en eguna. Museoa jendez lepo zegoen sartu garenerako, bakarrik goizeko 9:30ak baziren ere. Koadroak ikusteko ilaran joan behar izan dugu eta ez da erosoegia izan.

Honetan ere, audiogiaren azalpenak labur samarrak izan dira; Rijksmuseum-ekoak baino luzeagoak, hori bai. Bost euro balio du audiogiak eta komenigarria da norberak bere aurikularrak eramatea. Van Goghen museoan ezin da argazkirik egin baina espabilaturen batzuk saiatzen dira eta noizean behin ondo irteten zaie.

Eguerdi aldera iparralderuntz egin dugu, Jordaan auzorantz. Herengracht kaletik gertu erosi dugu ogia, 2012an inguruan egon nintzen Maite, Unai, eta Aitorrekin. Westerkerk elizaren parean egin ditugu ogitartekoak eta Anna Frank bizi izan zen etxea bisitatzera zihoan jendetzak harritu gaitu.

Bazkal ondoren De Otter errota bistaratzera joan gara, Amsterdam inguruan dagoen errota bakarra [hau ez dut uste egia denik]. Baina ez dago bisitatzetik. Hori bai, hainbeste ibili gara gozotegi batean sartzea erabaki dugula, eta ez da edozein gozotegi izan.

Winkel 43 izeneko gozotegia sagar-tartengatik da ospetsua. Nirekin datozenak flojo batzuk dira eta ez dute lortu sagar-tarta zati bat zazpiren artean bukatzea. Ni tarta osoa jateko prest.

Beranduago Amsterdam Centraal tren-geltokia ikusi dugu. Bihar hona etorriko gara azkenean Utrecht bisitatzea erabakitzen badugu.

Supermerkatutik pasa ondoren, dutxa azkar bat eta gero, hotel parean dugun pub batean afaldu dugu, Operaren inguruan —eta 2012an bizikletak saltzea lortu genuen inguruan—. Janaria ez da batere ona izan.

Egunotan itzaletan fresko samar egiten badu ere, eguzkiak gogotik berotzen du. Bihar tenperaturak nabarmen egingo du gora eta abisu horia dago ekaitz arriskuagatik. Horrek baldintzatuko du biharko egitaraua.