Hitzak

Kategoria: Herbehereak (2012)

2012ko ekainean Herbeheretara egindako bidaiaren kronikak.

  • Zwolle

    Koartza hauskara ubide baten bazterreko belarretan.

    Atzo abiadura marka hautsi genuen. Ibilbidean ferry bat arratsaldeko seiak baino lehen hartu behar genuela-eta. Hasieran haizea baino ez zena, euri tanta bilakatu ziren, eta bidea amaitzen ari ginenerako euri zaparradak izan genituen.

    Pozik iritsi ginen Zwollera, arratsaldea aprobetxatuko genuelakoan, baina hotela aurkitzea ez zen batere erraza izan eta azkenen betiko orduan afaldu genuen; hori bai, partidua ikusteko aukera izan genuen. Hotela herriaren kanpoaldean dago eta inguruan ez du gauza askorik, beraz, bertan izan zen afaria.

    Orain Meppeleruntz goaz, ea bidean supermerkatu bat aurkitzen dugun.

  • Utrecht

    Nederlanderaz "bidegorri" eta "duna bidea" dioen bide-seinalea, atzean zuhaitz batzuk dituela.

    Ez zenukete sinistuko non lo egin dugun bart. Tokia hain da kutrea janaria oparitzen dutela.

    Hasteko, check in egiterakoan, bi botila ardo. Gosari, bazkari eta afariak prezioaren barruan daude, baina norberak prestatu behar ditu. Lehengaiak patatak, arrautzak, kipulak, makarroiak eta haragi apur bat, «nahi izatekotan patioan barbakoa bat egiteko». Ez hori bakarrik, lagunak ere gonbidatu ditzazkegu hemen jateko!

    Bizikleta bat zokutoekin piknikeko mahai baten kontra. Bizikleten bidea dikearen goikaldetik dihoa, argazkiaren eskumako aldean. Ezkerreko aldean ubidea ikus daiteke. Zerua urdin dago baina ekaitz hodeiak daude.

    Esan beharrik ez dago ahalik eta gauza gutxien ikutzea dela gomendiorik onena. Ez dut zehaztasun gehiegirik eman nahi, sukaldean xagu bat ikusi genuela baino ez.

    Gaur hirugarren eguna da, 134 Km egin ditugu dagoeneko eta gaur beste 60 egingo ditugu. Bizikletekin arazo txikiak ditugu baina nabarmentzeko ezer ez. Fisikoki ere nahiko ondo gaude baina nire ezkerreko eskuak sentikortasun eta mugikortasuna galdu du eta gauerako hobetu ez bada zerbait egin beharko dut.