Amsterdam, uztailak 17

Bart gaueko hodeiak desagertu eta oskarbi argitu du eguna gaurkoan. Ez dugu astirik galdu eta gosaldu ondoren Rijksmuseum-era joan gara zuzenean, falta zitzaizkigun bi sarrerak inprimatu ditugun bezain laster.

Foam argazkilaritza museo paretik pasata, Museumplein-era iritsi gara. Pare bat bista gidatu egin ditugu mugikorra lagun genuela: bata museoan dauden obra garrantzitsuenei buruzkoa eta bestea museoaren eraikinari berari buruzkoa. Espero baino laburragoak izan dira biak.

Goiz samar joan bagara ere, jende andana zegoen eta orduak pasa ahala are gehiago egongo ziren. Turista hutsak izan gara beste milaka turistarekin lehiatzen, koadroa gertuagotik nork ikusiko.


Pare bat gauza on ditu museoak. Batetik, mugikorrerako aplikazioa dauka bista gidatuekin. Zure kabuz joan zaitezke, azalpenak oso landuak ez badira ere. Bestetik, argazkiak egitea baimenduta dago, flasharekin ez bada.

Museoko tabernan freskagarri bat hartu dugu ondorengo orduetan egin beharrekoak antolatu bitartean. I amsterdam ikur famatuaren aurrekaldean egin dugu egin beharreko argazkia eta Vondelpark parke bitxira joan gara.

Bitxia da diotenez —eta baldintza batzuen barruan— parkean sexu harremanak izatea baimenduta dagoelako, baina erretzea debekatuta dagoelako.

Bertan jan dugu bidetik erositako ogitartekoa, bizikleten trafiko kaotiko sinkronizatuak harritzen gintuen bitartean.


Geroago De Pijp auzora gerturatu gara, eta bertan igaro dugu arratsaldea. Sarphatipark parkea eta Albert Cuypmarkt merkatua ikusi ditugu beste batzuen artean. Iritsi orduko merkatua jasotzen ari ziren. Hiriko gainontzeko tokiak bezala, zikina iruditu zaigu. Uso, kaio, eta koartzak ari ziren janari arrastoei eta zarama poltsei mokoa sartzen.

Merkatua, harrigarria bada ere, egunero montatu eta jasotzen da.

Eguna amaitzeko, hoteletik pasa, dutxa bat hartu, eta nahiko gertu dagoen jatetxe batean afaldu dugu. Onerako harritu gaitu janariak.

Tenperatura 20 graduren bueltan ibili da gaur —eguzkitan bero handia egiten bazuen ere— eta apurka-apurka igoko da ondorengo egunetan, horrek ekaitz arriskua ere handituko du.

Museumplein-era itzuliko gara bihar ere, Van Gogh-en museoa ikustera oraingoan.

Iruzkinik?

This site uses Akismet to reduce spam. Learn how your comment data is processed.